ཡབ་ཆེན་ལགས། *ངའི་ཕ་ཡུལ་གྱི་རྒྱབ་རི་སྨུག་པོ

ལོ་ཟླའི་ཕྲེང་བ   ཁྱེད་ཀྱི་འཛུབ་བར་ནས་ག་ལེར་ཟད
ཤུལ་དུ་ལུས་བ་ནི་འོད་ཟེར་ཞིག      ང་དང་མིང་སྲིང་ཚོའི་སེམས་སུ་འཚེར་བའི
ཁྱིམ་གཞིའི་འདིའི་འདས་མ་ད་གསུམ་ལ་གཟིགས་པའི
ནམ་ཡང་ཡལ་བ་མེད་པའི་འོད་ཟེར་ཞིག
ཁྱེད་རང་རྒྱུད་མྱོང་པའི་འཇིག་རྟེན་གྱི་གྲུ་ག་མཐའ་དག་ན
རྐང་རྗེས་ཁྲི་འབུམ་ལ་དགའ་སྐྱོ་ཟུང་གི་གཏམ་རྒྱུད་མངའ
ཀློག་དེབ་ཀྱི་ངོས་ན་མེད་པའི་སློབ་ཚན་དག
ང་ལ་བཞག་པའི་རིན་ཆེན་རྒྱུ་ནོར་ལགས

ཡབ་ཆེན་ལགས    ངའི་ཕ་ཡུལ་གྱི་རྒྱབ་རི་སྨུགཔོ
དགུན་ཟླ་བཅུ་བའི་གྲང་མངར་དང་ལྷན་དུ
རི་གསུམ་རྩེ་ན་འདུར་བཞིན་པ་དེ་ཁྱོད་ཡིན་
དབྱར་ཟླ་དྲུག་པའི་ཆར་ཆུ་དང་མཉམ་དུ་
ལུང་གསུམ་མདོ་ན་འབབས་གྱིན་པ་དེའང་ཁྱོད་ཡིན
ཐོ་རེངས་བྱ་སྐད་མ་གྲགས་པའི་ཡར་སྔོན་ནས
ཁྱེད་དང་མཛོ་ཆུང་ཁྲ་རིལ་སྣང་ཞིང་གྲུ་བཞིའི་ཁ་རུ་སླེབས་ཡོད
མུན་པ་དང་ས་ཞིང་མཉམ་དུ་གཤེགས་བཞིན་ཡོད་ལ
གྲོ་ནས་སྲན་གསུམ་ལ་ཁ་དོག་གསར་བ་ཞིག་བསྩོལ་བཞིན་ཡོད

ཡབ་ཆེན་ལགས ངའི་ཕ་ཡུལ་གྱི་རྒྱབ་རི་སྨུགཔོ
གར་འོང་མི་ཤེས་བའི་ཡ་ཐོད་ཀྱི་རྒས་གཉེར་ཟབ་མོེ་རུ
རྒྱལ་ཕམ་རེས་སུ་འཁོར་ཅིང་    རྔུལ་ཆུ་ཤམ་ཤམ་བཞུར་
 སྲ་འཁྲེགས་ཀྱི་སྤོབས་པ་ལ་བློ་རིག་གིི་རྣོ་དཔལ་མངའ་བས
འཚོ་བ་ལ་ཁ་དོག་ལྡན་པར་བྱས་ཡོང     གོ་ཁ་ལ་དྲོད་ཁོལ་མཛོམས་སུ་བཅུག་ཡོད
འོན་ཀྱང    ཁྱེད་ནི་འཇིག་རྟེན་ལ་སྡོམ་ཚིག་འཇོག་མཁས་ཀྱི་
མཚན་ཉིད་རིག་པ་ཞིག་མིན་ཀྱང
ཁྱེད་རང་རྒྱུད་མྱོང་བའི་ཀྱག་ཀྱོག་གི་ལམ་ཕྲན་སྟེང
ངས་བཏུས་ཆོག་པའི་ལེགས་བཤད་ཅི་འདྲིའི་མང་འང   ཡབ་ཆེན་ལགས

ཡབ་ཆེན་ལགས  ངའི་ཕ་ཡུལ་གྱི་རྒྱབ་རི་སྨུག་པོ
ཁྱེད་ཀྱི་འདབ་གཤོག་ཟུང་གི་མཐུ་འོག་ནས
འཁོར་བ་ནི་  བྱིས་དུས་ཀྱི་རྩེད་ར་ཆུང་ཆུང་ལྟར་སྣང་ཞིང
འཁོར་བ་ནི་  མ་བཅོས་རང་བྱུང་གི་འཇའ་ཚོན་ཉིད་དུ་སེམས
དེ་རིང        དངོས་ཡོད་ལྟ་བའི་ལྟར་སྣང་འདི་ལ་གྱེས་བརྡ་གཏོང་དུས
ངས་ཁྱེད་རང་དྲན་ཤིང         ཁྱེད་རང་གླེང
ཡབ་ཆེན་ལགས་       ངའི་ཕ་ཡུལ་གྱི་རྒྱབ་རི་སྨུག་པོ

*སྨན་བླའི་ཚིག
                                                         2013.10.21              

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s